ابڙو اڪيڊمي Abro Academy
2020-07-22
داخلا نمبر 630
عنوان تـُورَ اڇي، حاجي لق لق
شاخ پکي
پڙهيو ويو 490
داخلا جو حوالو:
تـُورَ اڇي، حاجي لق لق
100 کان 115 سينٽي ميٽر (45 انچ) جسامت جي هن پکيءَ جا نر ماد هڪجهڙا هوندا آهن. ان جي پُٺي ۽ پيٽ سميت سڄو جسم اڇو هوندو آهي. البت پَرن جي پوئين حصي جا کنڀ ڪارا آهن. تانگهن پاڻين، تلائن، چشمن ۽ گپراٺن علائقن ۾ پاڻي جهاڳيندو، مڇي ۽ ڏيڏر ڳوليندو نظر ايندو آهي. اڇي تُور، جنهن کي حاجي لق لق به چون ٿا، اڪثر ساريالن خطن ۾ به شڪار ڳوليندو آهي. ان جو شڪار مڇي، ڏيڏر، ننڍڙا مماليه ۽ جيت ٿين ٿا.
متوازن ، پختي ۽ هوريان اڏام اڏامندو آهي ۽ ڪڏهن ڪڏهن لامارا به ڏيندو آهي. اڏار دوران ڳچي اڳتي ۽ پير پوئتي نڪتل هوندا اٿس. حاجي لق لق خاص ڪري هجرت وقت ڊگهي سفر دوران تيز هوا تي مٿي کڄندو ۽ ڦيريون پائيندو آهي. حاجي لق لق جوڙين ۾ يا ننڍن گروهن ۾ نسل وڌائڻ کانپوءِ سياري ۾ لڏ پلاڻ ڪندو آهي.
ان جو آکيرو وڻن يا عمارتن تي ڪاٺين جي ٿلهي وانگر هوندو آهي، جنهن جو خالي وچ گاهه ڪانن وغيره سان ڀريل هوندو آهي. يورپ ۽ اتر هندستان ۾ افزائش نسل ڪندو آهي ۽ سياري ۾ ڏکڻ ايشيا ۽ آفريڪا ۾ پکڙجي ويندو آهي.
اڇي تُور جي کنڀن جي پکيڙ 155 کان 165 سينٽي ميٽر ۽ وزن 3 کان 4 ڪلو گرام ٿئي ٿو. مادي اڇي رنگ جا 3 کان 5 آنا ڏئي ٿي. ھي ماحول : 7 جو پکي آھي.